उच्चदाब वीजवाहिनीवर काम करताना तरुण लाईनमनचा विजेच्या धक्क्याने दुर्दैवी मृत्यू; कुटुंबीयांना आर्थिक मदत मिळण्याच्या मागणीसाठी ग्रामस्थांचे 'रास्ता रोको' आंदोलन

 उच्चदाब वीजवाहिनीवर काम करताना तरुण लाईनमनचा विजेच्या धक्क्याने दुर्दैवी मृत्यू; कुटुंबीयांना आर्थिक मदत मिळण्याच्या मागणीसाठी ग्रामस्थांचे...

 उच्चदाब वीजवाहिनीवर काम करताना तरुण लाईनमनचा विजेच्या धक्क्याने दुर्दैवी मृत्यू; कुटुंबीयांना आर्थिक मदत मिळण्याच्या मागणीसाठी ग्रामस्थांचे  'रास्ता रोको' आंदोलन 

उत्तम माने लातूर

(संपादक -:- हेमकांत गायकवाड)

लातूर जवळील मुरुड-निवळी (तालुका लातूर) परिसरात एक अतिशय दुःखद आणि हृदयद्रावक घटना घडली आहे. येथील एका शेतशिवारात ३३ केव्ही क्षमतेच्या उच्चदाब वीजवाहिनीच्या पोलवर काम करत असताना एका तरुण खाजगी लाईनमनला विजेचा जोरदार धक्का बसला. या गंभीर दुर्घटनेत या तरुणाला आपले प्राण गमवावे लागले आहेत. ही घटना बुधवारी सायंकाळी घडली असून, ऐन उमेदीच्या काळात घरातील तरुण मुलाचा असा अनपेक्षित मृत्यू झाल्याने संपूर्ण निवळी आणि मुरुड परिसरातून मोठी हळहळ व शोक व्यक्त केला जात आहे. अजित संजय मस्के (वय ३० वर्षे, राहणार निवळी) असे या दुर्दैवी घटनेत प्राण गमावलेल्या मृत तरुणाचे नाव आहे. अजित हे खाजगी लाईनमन म्हणून काम करून आपल्या कुटुंबाचा उदरनिर्वाह करत होते. उपलब्ध माहितीनुसार, निवळी येथील एका शेतकऱ्याच्या शेतात असलेल्या विद्युत खांबाजवळची 'स्टे' (आधार देणारी तार) काढण्याचे काम करण्यासाठी ते पोलवर चढले होते. मात्र, या अत्यंत जोखमीच्या वेळी वीजपुरवठा सुरूच होता. वीजपुरवठा सुरू असलेल्या लाईनच्या पोलवर काम करत असताना त्यांना अचानक विजेचा अत्यंत जोरदार धक्का बसला. उच्चदाबाचा प्रवाह असल्यामुळे या तीव्र धक्क्याने ते थेट पोलवरून खाली जमिनीवर कोसळले.

घटना घडताच तिथे उपस्थित असलेल्या ग्रामस्थांनी आणि नागरिकांनी तातडीने धाव घेत अजित यांना उपचारासाठी लातूर येथील शासकीय वैद्यकीय महाविद्यालय व रुग्णालयात दाखल केले. परंतु, दुर्दैवाने उपचारापूर्वीच त्यांची प्राणज्योत मालवली होती. रुग्णालयात पोहोचल्यानंतर डॉक्टरांनी आवश्यक ती तपासणी करून त्यांना मृत घोषित केले. अजित यांच्या पश्चात त्यांचे आई-वडील, पत्नी आणि एक लहान मुलगा असा परिवार आहे. कुटुंबाचा मुख्य आधार हरपल्याने मस्के कुटुंबीयांवर दुःखाचा मोठा डोंगर कोसळला आहे. या घटनेमुळे ग्रामस्थ आणि नातेवाईक तीव्र दुःखात तसेच संतापात होते. मृत अजित मस्के यांच्या कुटुंबीयांवर अचानक ओढवलेले हे संकट पाहता शासनाकडून त्यांना तत्काळ योग्य ती आर्थिक मदत जाहीर करण्यात यावी, अशी आग्रही मागणी करत गुरुवारी सकाळी ग्रामस्थांनी आक्रमक पवित्रा घेतला. त्यांनी थेट निवळी सबस्टेशनसमोर मृतदेह ठेवून ठिय्या आंदोलन सुरू केले, तसेच काही काळ रस्ता रोको आंदोलनही केले. या आंदोलनामुळे परिसरात काही काळ तणाव निर्माण झाला होता. परिस्थितीचे गांभीर्य ओळखून पोलिसांनी तातडीने घटनास्थळी धाव घेतली आणि मध्यस्थी करत नातेवाइकांची व ग्रामस्थांची समजूत काढली. पोलिसांच्या आश्वासनानंतर आणि यशस्वी शिष्टाईनंतर तेथील तणावपूर्ण वातावरण निवळले. त्यानंतर निवळी या त्यांच्या मूळ गावी अत्यंत शोकाकुल आणि भावपूर्ण वातावरणात मयत अजित मस्के यांच्यावर अंत्यसंस्कार करण्यात आले