NEET पेपरफुटीचा 'नगर' कनेक्शन..पुण्यातून पसार झालेला दुसरा मुख्य आरोपी अहिल्यानगरमध्ये जेरबंद! सीबीआयच्या माहितीनंतर स्थानिक पोलिसां...
सीबीआयच्या माहितीनंतर स्थानिक पोलिसांची धडाकेबाज कारवाई आरोपी धनंजय लोखंडे पोलिसांच्या ताब्यात 
सचिन मोकळं अहिल्यानगर
(संपादक -:- हेमकांत गायकवाड)
अहिल्यानगर:- देशभर गाजत असलेल्या NEET पेपरफुटी प्रकरणाचे धागेदोरे आता अहिल्यानगरपर्यंत पोहोचले आहेत.पुणे येथून पोलिसांना चकवा देऊन पसार झालेला या प्रकरणातील दुसरा मुख्य आरोपी धनंजय लोखंडे याला पकडण्यात अहिल्यानगर पोलिसांना मोठे यश आले आहे. पहाटेच्या सुमारास रचलेल्या सापळ्यात लोखंडे शिताफीने पोलिसांच्या जाळ्यात अडकला.
पुण्यातून पलायन आणि नगरमध्ये एन्ट्री
नाशिकच्या नांदगावमधील आरोपी खैरनार याला अटक केल्यानंतर लोखंडे याचे नाव समोर आले होते. पुणे पोलीस त्याच्या मागावर असल्याचे समजताच लोखंडे याने आपला मोबाईल बंद केला आणि तो पोलिसांच्या कारवाईपासून वाचण्यासाठी पुण्याबाहेर पळाला होता. तो मूळचा अहिल्यानगरचा असल्याने तो शहरातच कुठेतरी लपला असल्याची पक्की माहिती पोलिसांना मिळाली होती.
सीबीआय आणि पोलिसांचा संयुक्त 'ट्रॅप'
लोखंडे पुण्यातून नगरला पळाला असताना सीबीआयचे पथकही त्याच्या मागावर होते. सीबीआयने दिलेल्या तांत्रिक माहिती आणि सूचनेनुसार, अहिल्यानगर पोलिसांनी शहरात विविध ठिकाणी सापळा लावला होता. अखेर पहाटेच्या सुमारास त्याला ताब्यात घेण्यात आले.
मोठ्या रॅकेटचा पर्दाफाश होण्याची शक्यता
धनंजय लोखंडे हा पुण्यात राहून या रॅकेटच्या संपर्कात होता, असा पोलिसांना संशय आहे. त्याच्या अटकेनंतर आता अनेक धक्कादायक खुलासे होण्याची शक्यता आहे:
पेपरफुटीच्या या रॅकेटमध्ये आणखी किती 'मोठे मासे' सामील आहेत?
पेपर नेमका कोठून आणि कसा लीक झाला?
उमेदवारांकडून किती वसुली करण्यात आली आणि हे पैसे कोणापर्यंत पोहोचले?
पुढील कारवाई आरोपी धनंजय लोखंडे सध्या स्थानिक पोलिसांच्या ताब्यात असून त्याची कसून चौकशी सुरू आहे. कागदोपत्री प्रक्रिया पूर्ण झाल्यानंतर त्याला लवकरच केंद्रीय अन्वेषण विभागाच्या (CBI) स्वाधीन करण्यात येणार आहे. या कारवाईमुळे पेपरफुटी प्रकरणातील मुख्य सूत्रधारांपर्यंत पोहोचण्यास मोठी मदत होणार आहे.
No comments