नेवासा येथील दोघांचे गुन्ह्यात बळजबरीने नाव टाकल्याचे प्रकरण भोवले;राष्ट्रपती पोलीस पदक विजेते पीएसआय राजेंद्र वाघ निलंबित! सचिन मोकळं अहिल...
नेवासा येथील दोघांचे गुन्ह्यात बळजबरीने नाव टाकल्याचे प्रकरण भोवले;राष्ट्रपती पोलीस पदक विजेते पीएसआय राजेंद्र वाघ निलंबित!
सचिन मोकळं अहिल्यानगर
(संपादक हेमकांत गायकवाड)
अहिल्यानगर : जिल्हा पोलीस दलातून एक धक्कादायक आणि खळबळजनक घटना समोर आली आहे. नेवासा येथील एका प्रकरणात दोन निरपराध व्यक्तींची नावे बळजबरीने गुन्ह्यात समाविष्ट केल्याच्या गंभीर आरोपावरून राष्ट्रपती पोलीस पदक विजेते पोलीस उपनिरीक्षक (पीएसआय) राजेंद्र वाघ यांच्यावर निलंबनाची कारवाई करण्यात आली आहे. या कारवाईमुळे जिल्हा पोलीस दलात मोठी खळबळ उडाली असून पोलीस वर्तुळात चर्चेला उधाण आले आहे. मिळालेल्या माहितीनुसार, नेवासा येथील एका गुन्ह्याच्या तपासादरम्यान पीएसआय राजेंद्र वाघ यांनी कोणतेही ठोस पुरावे किंवा कायदेशीर आधार नसताना दोन व्यक्तींची नावे आरोपी म्हणून गुन्ह्यात समाविष्ट केल्याचा आरोप करण्यात आला होता. याबाबत संबंधितांकडून वरिष्ठ अधिकाऱ्यांकडे तक्रार दाखल करण्यात आल्यानंतर प्रकरणाची गंभीर दखल घेण्यात आली. तक्रारीनंतर झालेल्या प्राथमिक चौकशीत आरोपांमध्ये प्रथमदर्शनी तथ्य आढळून आल्याचे समोर आले. आपल्या अधिकाराचा गैरवापर करून निष्पाप नागरिकांना गुन्ह्यात अडकवण्याचा प्रयत्न झाल्याचे निदर्शनास आल्याने पोलीस प्रशासनाची प्रतिमा मलिन झाल्याची भावना व्यक्त केली जात आहे.
या प्रकरणाची गंभीरता लक्षात घेऊन जिल्हा पोलीस अधीक्षक मुम्मका सुदर्शन यांनी तातडीने कारवाई करत पीएसआय राजेंद्र वाघ यांना निलंबित करण्याचे आदेश दिले. या निर्णयामुळे पोलीस दलात एकच खळबळ उडाली असून पुढील चौकशीकडे सर्वांचे लक्ष लागले आहे.
राष्ट्रपती पोलीस पदकाच्या मानाला धक्का
राजेंद्र वाघ यांना यापूर्वी त्यांच्या उल्लेखनीय आणि उत्कृष्ट सेवेसाठी देशातील प्रतिष्ठेचे ‘राष्ट्रपती पोलीस पदक’ प्रदान करण्यात आले होते. मात्र, अशा सन्मानित अधिकाऱ्यावर गंभीर आरोप होऊन त्यांच्यावर निलंबनाची कारवाई झाल्याने पोलीस दलाच्या प्रतिमेला मोठा धक्का बसल्याची चर्चा सुरू आहे. दरम्यान, या प्रकरणाची सखोल चौकशी सुरू असून चौकशी अहवालानुसार पुढील प्रशासकीय कारवाई होण्याची शक्यता व्यक्त केली जात आहे.
No comments