हरिपूरा येथील सुकी नदीच्या पाण्याच्या डोहात बुडून यावलच्या १७ वर्षीय मुलाचा मृत्यू, पर्यटनासाठी गेलेल्या कुटुंबातील एकुलत्या एक मुलावर काळाचा घाला; शहरातुन हळहळ

 हरिपूरा येथील सुकी नदीच्या पाण्याच्या डोहात बुडून यावलच्या १७ वर्षीय मुलाचा मृत्यू, पर्यटनासाठी गेलेल्या कुटुंबातील एकुलत्या एक मुलावर काळा...

 हरिपूरा येथील सुकी नदीच्या पाण्याच्या डोहात बुडून यावलच्या १७ वर्षीय मुलाचा मृत्यू,

पर्यटनासाठी गेलेल्या कुटुंबातील एकुलत्या एक मुलावर काळाचा घाला; शहरातुन हळहळ 

भरत कोळी यावल

(संपादक -:- हेमकांत गायकवाड)

यावल : तालुक्यातील सातपुडा पर्वतरांगांतील हरिपूरा धरणाच्या वरील बाजुस असलेल्या सुकी नदीच्या डोहात रविवारी (दि. १९) दुपारी घडलेल्या दुर्दैवी घटनेत यावल शहरातील १७ वर्षीय मुलाचा पाण्यात बुडून मृत्यू झाला. जयेश संजय फेगडे (रा. महाजन गल्ली, यावल) असे मृत तरुणाचे नाव असून तो कुंटुंबातील एकुलता एक मुलगा होता. या घटनेमुळे यावल शहरात शोककळा पसरली आहे.

मिळालेल्या माहितीनुसार, जयेश फेगडे हा रविवारी सुट्टी असल्याने आपल्या चुलत भाऊ व वहिनीसोबत हरिपूरा धरण परिसरात फिरण्यासाठी गेला होता. पावसामुळे नटलेल्या निसर्गाचा आनंद घेत असताना तो धरणाच्या वरील बाजुस असलेल्या सुकी नदीच्या डोहातील पाण्यात पोहण्याकरीता गेला. त्यात पाण्याच्या खोलीचा अंदाज न आल्याने तो पाण्यात बुडाला. सोबत असलेल्या नातेवाइकांनी त्याला वाचविण्याचा प्रयत्न केला; मात्र तो निष्फळ ठरला.

जयेश हा यावल येथील होमगार्ड संजय सिताराम फेगडे यांचा मुलगा होता. घटनेची माहिती मिळताच स्थानिक नागरिकांनी घटनास्थळी धाव घेतली. त्यानंतर मृतदेह पाण्यातून बाहेर काढून शवविच्छेदनासाठी यावल ग्रामीण रुग्णालयात आणण्यात आला. या घटनेनंतर रुग्णालयात नातेवाइकांसह नागरिकांनी मोठी गर्दी केली होती. तर या प्रकरणी यावल पोलिस ठाण्यात अकस्मात मृत्यूची नोंद करण्यात आली आहे. पुढील तपास पोलिस निरिक्षक रंगनाथ धारबळे यांच्या मार्गदर्शनाखाली हवालदार सुनिल पाटील करीत आहे. कुटुंबातील एकुलत्या एक मुलाच्या आकस्मिक निधनाने फेगडे कुटुंबावर दुःखाचा डोंगर कोसळला असून, संपूर्ण यावल परिसरातून हळहळ व्यक्त होत आहे.