अंतुर्ली केंद्र शाळेत विद्यार्थ्यांनी साकारल्या देशाच्या जवानांसाठी प्रेमाच्या राख्या!

 अंतुर्ली केंद्र शाळेत विद्यार्थ्यांनी साकारल्या देशाच्या जवानांसाठी प्रेमाच्या राख्या!    किरण धायले अंतुर्ली, ता. मुक्ताईनगर  (संपादक -:-...

 अंतुर्ली केंद्र शाळेत विद्यार्थ्यांनी साकारल्या देशाच्या जवानांसाठी प्रेमाच्या राख्या! 

  किरण धायले अंतुर्ली, ता. मुक्ताईनगर 

(संपादक -:- हेमकांत गायकवाड)

मुक्ताईनगर तालुक्यातील जिल्हा परिषद केंद्र शाळा अंतुर्ली येथे आनंददायी व कृतीयुक्त शिक्षण उपक्रमांतर्गत विद्यार्थ्यांसाठी राखी बनविण्याचा उपक्रम उत्साहात आणि आनंददायी वातावरणात पार पडला. या उपक्रमातून विद्यार्थ्यांना प्रत्यक्ष कृतीतून शिकण्याची संधी मिळाली, तसेच देशाच्या सीमेवर कर्तव्य बजावणाऱ्या जवानांप्रती प्रेम, आदर आणि कृतज्ञतेची भावना जोपासण्यात आली.

या कार्यक्रमासाठी अंतुर्ली केंद्राचे केंद्रप्रमुख श्री. विजय गोसावी हे प्रत्यक्ष उपस्थित होते. त्यांनी विद्यार्थ्यांना स्वतः राखी बनविण्याचे प्रात्यक्षिक करून दाखवत उपक्रमाची माहिती दिली. तसेच शाळेचे मुख्याध्यापक आणि सर्व शिक्षकांनीही विद्यार्थ्यांना राखी तयार करण्याची पद्धत प्रत्यक्ष कृतीतून समजावून सांगितली.

शिक्षकांच्या मार्गदर्शनाखाली विद्यार्थ्यांनी स्वतः विविध रंगांच्या व आकर्षक राख्या तयार केल्या. या उपक्रमात शाळेतील सर्व विद्यार्थ्यांनी मोठ्या उत्साहाने सहभाग घेतला. हाताने राखी तयार करण्याचा आनंद घेत असतानाच विद्यार्थ्यांना सर्जनशीलता, कौशल्य आणि प्रत्यक्ष कृतीतून शिक्षणाचा अनुभव मिळाला.

विशेष म्हणजे, विद्यार्थ्यांनी तयार केलेल्या या सर्व राख्या देशाच्या सीमेवर अहोरात्र सेवा बजावणाऱ्या जवानांना पोस्टाद्वारे पाठविण्यात येणार आहेत. त्यामुळे विद्यार्थ्यांच्या या उपक्रमाला देशभक्तीची भावनाही जोडली गेली आहे.

शिक्षण हे केवळ पुस्तकांपुरते मर्यादित न राहता प्रत्यक्ष कृती, अनुभव आणि सामाजिक जाणीव यांच्या माध्यमातून विद्यार्थ्यांच्या व्यक्तिमत्त्वाचा विकास व्हावा, या उद्देशाने राबविण्यात आलेला हा उपक्रम कौतुकास्पद ठरला.