मलकापूरात स्वातंत्र्यदिनाच्या उत्साहात ‘भव्य तिरंगा यात्रा’; माऊली फाउंडेशनचा पुढाकार

 मलकापूरात स्वातंत्र्यदिनाच्या उत्साहात ‘भव्य तिरंगा यात्रा’; माऊली फाउंडेशनचा पुढाकार अमोल बावस्कार बुलढाणा (संपादक -:- हेमकांत गायकवाड) मल...

 मलकापूरात स्वातंत्र्यदिनाच्या उत्साहात ‘भव्य तिरंगा यात्रा’; माऊली फाउंडेशनचा पुढाकार

अमोल बावस्कार बुलढाणा

(संपादक -:- हेमकांत गायकवाड)

मलकापूर  : भारताच्या ८० व्या स्वातंत्र्यदिनाचे औचित्य साधून देशभक्तीचा जागर आणि राष्ट्रध्वजाप्रती अभिमानाची भावना जनमानसात अधिक दृढ करण्यासाठी माऊली फाउंडेशन, मलकापूर यांच्या वतीने शनिवारी, १५ ऑगस्ट २०२६ रोजी भव्य तिरंगा यात्रेचे आयोजन करण्यात आले आहे. या तिरंगा यात्रेत शहरातील नागरिकांनी मोठ्या संख्येने सहभागी होण्याचे आवाहन आयोजकांच्या वतीने करण्यात आले आहे.

हुतात्मा स्मारक ते शहीद संजयसिंह राजपूत स्मारक असा तिरंगा यात्रेचा मार्ग राहणार असून, सकाळी ९:३० वाजता यात्रेला सुरुवात होणार आहे. देशासाठी बलिदान देणाऱ्या हुतात्म्यांना अभिवादन करत राष्ट्रध्वजाच्या सन्मानार्थ ही तिरंगा यात्रा काढण्यात येणार आहे.

स्वातंत्र्यदिन हा केवळ उत्सवाचा दिवस न राहता स्वातंत्र्य मिळवून देण्यासाठी आपल्या प्राणांची आहुती देणाऱ्या स्वातंत्र्यसैनिक आणि हुतात्म्यांच्या त्यागाचे स्मरण करण्याचा दिवस आहे. याच भावनेतून माऊली फाउंडेशनने तिरंगा यात्रेचे आयोजन केले आहे. यात्रेदरम्यान देशभक्तीपर वातावरण निर्माण करून ‘एक देश, एक तिरंगा आणि राष्ट्र प्रथम’ या भावनेचा संदेश नागरिकांपर्यंत पोहोचविण्याचा प्रयत्न केला जाणार आहे.

मलकापूर शहरातील विविध क्षेत्रांतील नागरिक, युवक, महिला, विद्यार्थी, सामाजिक कार्यकर्ते तसेच देशप्रेमी नागरिकांनी या उपक्रमात सहभागी होऊन तिरंगा यात्रेची शोभा वाढवावी, असे आवाहन आयोजकांनी केले आहे.

हुतात्म्यांच्या स्मृतीला अभिवादन

हुतात्मा स्मारकापासून सुरू होणारी ही यात्रा शहीद संजयसिंह राजपूत स्मारकापर्यंत पोहोचणार असल्याने देशासाठी बलिदान देणाऱ्या वीरांच्या स्मृतीला अभिवादन करण्याचा भावनिक संदेश या उपक्रमातून दिला जाणार आहे. राष्ट्रध्वजाचा सन्मान राखत शिस्तबद्ध पद्धतीने तिरंगा यात्रेत सहभागी होण्याचे आवाहनही करण्यात आले आहे.

स्वातंत्र्यदिनाच्या पार्श्वभूमीवर मलकापूर शहरात देशभक्तीचा उत्साह निर्माण करणाऱ्या या तिरंगा यात्रेकडे नागरिकांचे लक्ष लागले असून, १५ ऑगस्ट रोजी सकाळी ९:३० वाजता मोठ्या संख्येने उपस्थित राहून राष्ट्रप्रेमाचा जागर करावा, असे आवाहन माऊली फाउंडेशन, मलकापूर यांच्या वतीने करण्यात आले आहे.