समाजकार्य महाविद्यालयात राष्ट्रीय ग्रंथपाल दिन उत्साहात साजरा

 समाजकार्य महाविद्यालयात राष्ट्रीय ग्रंथपाल दिन उत्साहात साजरा  चोपडा प्रतिनिधी :  (संपादक -:- हेमकांत गायकवाड) भगिनी मंडळ चोपडा संचलित समा...

 समाजकार्य महाविद्यालयात राष्ट्रीय ग्रंथपाल दिन उत्साहात साजरा 

चोपडा प्रतिनिधी : 

(संपादक -:- हेमकांत गायकवाड)

भगिनी मंडळ चोपडा संचलित समाजकार्य महाविद्यालय, चोपडा येथे बुधवार, दि. १२ ऑगस्ट २०२६ रोजी भारतातील ग्रंथालयशास्त्राचे जनक डॉ. एस. आर. रंगनाथन यांच्या जयंतीनिमित्त राष्ट्रीय ग्रंथपाल दिन उत्साहपूर्ण वातावरणात साजरा करण्यात आला.

कार्यक्रमाच्या प्रारंभी डॉ. एस. आर. रंगनाथन यांच्या प्रतिमेस पुष्पहार अर्पण करून अभिवादन करण्यात आले. यावेळी कार्यक्रमाचे प्रमुख पाहुणे श्री. रमेश एस. पाटील, मुख्याध्यापक, महात्मा गांधी माध्यमिक व उच्च माध्यमिक विद्यालय, लासूर, ता. चोपडा, जि. जळगाव यांनी विद्यार्थ्यांना मार्गदर्शन केले.

यावेळी बोलताना श्री. रमेश पाटील यांनी “ग्रंथालय हे ज्ञानाचे भांडार असून विद्यार्थ्यांनी वाचनाची सवय जोपासली पाहिजे,” असे प्रतिपादन केले. वाचन हे विद्यार्थी जीवनातील ज्ञानप्राप्तीचे महत्त्वाचे साधन असून नियमित वाचनामुळे विद्यार्थ्यांचे ज्ञान, विचारशक्ती, कल्पनाशक्ती, आकलनशक्ती तसेच शब्दसंपत्ती वाढण्यास मदत होते, असे त्यांनी सांगितले.

कार्यक्रमात महाविद्यालयाचे प्राचार्य डॉ. ईश्वर सौदाणकर यांनी ग्रंथालयाचे महत्त्व आणि विद्यार्थ्यांच्या शैक्षणिक विकासात वाचन संस्कृतीची भूमिका याविषयी मार्गदर्शन केले. विद्यार्थ्यांनी नियमितपणे ग्रंथालयाचा वापर करून विविध विषयांवरील पुस्तके वाचावीत, असे आवाहन त्यांनी केले.

यावेळी महाविद्यालयाच्या ग्रंथालयात विविध विषयांवरील पुस्तकांचे ग्रंथ प्रदर्शन आयोजित करण्यात आले होते. विद्यार्थ्यांनी या ग्रंथ प्रदर्शनास उत्स्फूर्त प्रतिसाद दिला.

महाविद्यालयाच्या ग्रंथपाल डॉ. कल्पना सोनवणे यांनी ग्रंथालयामार्फत राबविण्यात येणाऱ्या विविध उपक्रमांची माहिती दिली. तसेच डॉ. एस. आर. रंगनाथन यांचे ग्रंथालय व माहितीशास्त्र क्षेत्रातील योगदान आणि त्यांच्या कार्याचा भारतीय ग्रंथालय चळवळीवर झालेला प्रभाव याविषयी माहिती विद्यार्थ्यांना देण्यात आली.

या कार्यक्रमास महाविद्यालयाचे उपप्राचार्य डॉ. आशिष गुजराथी, ग्रंथालय समितीचे सन्माननीय सदस्य, प्राध्यापकवृंद, ग्रंथालय कर्मचारी तसेच विद्यार्थी मोठ्या संख्येने उपस्थित होते.

कार्यक्रमाच्या शेवटी उपस्थितांचे आभार मानण्यात आले. ज्ञान, वाचन आणि ग्रंथालय संस्कृतीचा संदेश देत राष्ट्रीय ग्रंथपाल दिनाची उत्साहपूर्ण वातावरणात सांगता झाली.