प्राचार्य पदाची शिस्त आणि सूरांची मैफिल डॉ. के जी पाटील यांची गायन कलासक्त भरारी

 प्राचार्य पदाची शिस्त आणि सूरांची मैफिल  डॉ. के जी पाटील यांची गायन कलासक्त भरारी  इदू पिंजारी फैजपूर  (संपादक -:- हेमकांत गायकवाड) फैजपूर ...

 प्राचार्य पदाची शिस्त आणि सूरांची मैफिल  डॉ. के जी पाटील यांची गायन कलासक्त भरारी 

इदू पिंजारी फैजपूर 

(संपादक -:- हेमकांत गायकवाड)

फैजपूर न्हावी, तंत्र व वैद्यक शिक्षण मंडळ, न्हावी मार्ग, फैजपूर संचलित जे. टी. महाजन इंजिनिअरिंग कॉलेज, फैजपूरचे प्राचार्य प्रा. डॉ. के. जी. पाटील हे शैक्षणिक व प्रशासकीय जबाबदाऱ्या समर्थपणे सांभाळतानाच आपल्या अंगी असलेल्या गायनकलेची आवर्जून जपणूक करीत संगीत क्षेत्रातही स्वतंत्र ओळख निर्माण करीत आहेत. प्राचार्यपदाची जबाबदारी, विद्यार्थ्यांचे शैक्षणिक प्रश्न आणि संस्थेच्या प्रशासकीय कामकाजात व्यस्त असतानाही त्यांनी आपल्या कलागुणांना वेळ देत संगीताची साधना सुरू ठेवली आहे.

शिक्षण क्षेत्रातील योगदानासोबतच संगीताची आवड जोपासणारे डॉ. पाटील निसर्गाच्या सान्निध्यात तसेच विविध सामाजिक, सांस्कृतिक आणि महाविद्यालयीन कार्यक्रमांमध्ये आपल्या सुमधुर आवाजाने गीत सादर करतात. त्यांच्या गायनात सुरांची अचूकता, तालाची जाण आणि भावभावनांचा सुरेख संगम जाणवतो. गीतातील भाव आपल्या आवाजातून प्रभावीपणे रसिकांपर्यंत पोहोचविण्याची त्यांची हातोटी विशेष उल्लेखनीय ठरत आहे. त्यामुळे त्यांच्या गायनाला उपस्थित रसिकांकडून उत्स्फूर्त दाद मिळताना दिसते.

विशेष म्हणजे, प्राचार्य म्हणून शिस्तप्रिय आणि कर्तव्यनिष्ठ व्यक्तिमत्त्व, तर संगीत क्षेत्रात मनमोकळा कलाकार, अशी त्यांची दुहेरी ओळख निर्माण झाली आहे. महाविद्यालयीन विद्यार्थ्यांमध्येही त्यांच्या या कलागुणांविषयी विशेष आकर्षण असून, डॉ. पाटील यांच्या आवाजातील गीतांना विद्यार्थी, स्नेही आणि मित्रपरिवाराकडून उत्स्फूर्त प्रतिसाद मिळतो. त्यांच्या गीतांच्या तालावर तरुणाई थिरकताना आणि कार्यक्रमात उत्साहाचे वातावरण निर्माण होताना दिसते.

शिक्षण आणि प्रशासन या दोन महत्त्वाच्या जबाबदाऱ्या सांभाळताना आपल्या कलाविष्कारालाही तितकेच महत्त्व देणारे डॉ. पाटील हे ‘व्यक्तिमत्त्वाला कलेची जोड मिळाली की जीवन अधिक समृद्ध होते’, याचे उत्तम उदाहरण ठरत आहेत. त्यांच्या गायनातून केवळ मनोरंजन होत नाही, तर संगीताविषयीची त्यांची आस्था, संवेदनशीलता आणि कलेशी असलेली आत्मीयताही प्रकर्षाने जाणवते. त्यांच्या या कलाप्रवासाचे विद्यार्थी व रसिकांकडून कौतुक होत असून, शिक्षण क्षेत्रासोबतच संगीत क्षेत्रातही त्यांची ही भरारी लक्षवेधी ठरत आहे.