भागुबाई मुरलीधर जाधव काळाच्या पडद्याआड जाधव परिवाराच्या मायेचे छत्र हरपले! शेवगांव / प्रतिनिधी (संपादक : हेमकांत गायकवाड) शेवगांव तालुक्यात...
भागुबाई मुरलीधर जाधव काळाच्या पडद्याआड
जाधव परिवाराच्या मायेचे छत्र हरपले!
शेवगांव / प्रतिनिधी
(संपादक : हेमकांत गायकवाड)
शेवगांव तालुक्यातील बक्तरपूर येथील भागुबाई मुरलीधर जाधव (वय ८२) यांचे नुकतेच दुःखद निधन झाले. त्यांच्या निधनाने जाधव परिवारावर दुःखाचा डोंगर कोसळला असून, परिवारासह नातेवाईक आणि परिसरात हळहळ व्यक्त होत आहे.
कष्ट, जिद्द, चिकाटी आणि कुटुंबासाठी आयुष्यभर केलेला त्याग यामुळे भागुबाई जाधव यांची परिसरात विशेष ओळख होती. त्यांनी पतीच्या खांद्याला खांदा लावत संसाराचा गाडा समर्थपणे पुढे नेला. घरातील जबाबदाऱ्या सांभाळतानाच त्यांनी शेतीच्या कामातही पतीला मोलाची साथ दिली. शेतीतील खोदकामासह विविध कामांमध्ये त्या स्वतः सहभागी होत असत. कष्टाची तमा न बाळगता कुटुंबाच्या उन्नतीसाठी त्यांनी आयुष्यभर मेहनत घेतली.
त्यांचे पती मुरलीधर जाधव यांचा सुक्या मिरचीचा प्रसिद्ध व्यापार होता. या व्यवसायातही भागुबाई यांनी पतीला मोलाची साथ दिली. संसार आणि व्यवसायाच्या जबाबदाऱ्या सांभाळत दोघांनी कष्ट, प्रामाणिकपणा आणि चिकाटीच्या बळावर आर्थिक स्थैर्य निर्माण केले. व्यवसायातून मिळालेल्या उत्पन्नातून स्थावर मालमत्ता उभी करण्यातही भागुबाई यांचा मोठा वाटा होता.
साधेपणा, कष्टाळूपणा आणि कुटुंबाप्रती असलेली निष्ठा ही त्यांच्या व्यक्तिमत्त्वाची ठळक वैशिष्ट्ये होती. कुटुंबातील प्रत्येक व्यक्तीला प्रेम, आधार आणि आपुलकी देत त्यांनी मोठा परिवार एकत्र बांधून ठेवला. सुख-दुःखाच्या प्रसंगी परिवारातील प्रत्येकाच्या पाठीशी खंबीरपणे उभे राहण्याचा त्यांचा स्वभाव होता. त्यामुळे त्यांच्या जाण्याने जाधव परिवाराने केवळ एक ज्येष्ठ व्यक्ती नव्हे, तर मायेची सावली आणि कुटुंबाला एकत्र बांधून ठेवणारा प्रेमळ आधार गमावला आहे.
भागुबाई जाधव यांच्या पश्चात लिंबाजी जाधव व पत्रकार बाळासाहेब जाधव हे दोन मुले, सौ. रुख्मिणी चोपडे व सौ. सुनंदा गाडे या दोन विवाहित मुली, सुना, नातवंडे असा मोठा परिवार आहे.
भागुबाई यांच्या निधनाने जाधव परिवारावर दुःखाचा डोंगर कोसळला असून, त्यांच्या कष्टमय आणि प्रेमळ जीवनाच्या आठवणी परिवाराच्या कायम स्मरणात राहतील. त्यांच्या निधनाबद्दल परिसरातून शोक व्यक्त करण्यात येत आहे.
वृत्त प्रसिद्धी सहयोग
समता मीडिया सर्व्हिसेस
श्रीरामपूर - 9561174111
No comments