नवरात्रोत्सवाच्या पार्श्वभूमीवर जळगाव पोलिसांची ‘ऑपरेशन ऑल आऊट’ मोहीम; अवैध धंद्यांविरुद्ध धडक कारवाई

 नवरात्रोत्सवाच्या पार्श्वभूमीवर जळगाव पोलिसांची ‘ऑपरेशन ऑल आऊट’ मोहीम; अवैध धंद्यांविरुद्ध धडक कारवाई जळगाव जिल्ह्यात विशेष तपासणी मोहीम; अ...

 नवरात्रोत्सवाच्या पार्श्वभूमीवर जळगाव पोलिसांची ‘ऑपरेशन ऑल आऊट’ मोहीम; अवैध धंद्यांविरुद्ध धडक कारवाई

जळगाव जिल्ह्यात विशेष तपासणी मोहीम; अवैध दारू, जुगार, अंमली पदार्थ आणि वाहतूक नियमभंगाविरुद्ध कठोर पावले 

अशोक कोळी चोपडा 

[संपादक - हेमकांत गायकवाड]    

नवरात्रोत्सव शांततेत, सुरक्षित आणि निर्भय वातावरणात साजरा व्हावा, तसेच जिल्ह्यात कायदा व सुव्यवस्था अबाधित राहावी, या उद्देशाने जळगाव जिल्हा पोलिसांच्या वतीने ‘ऑपरेशन ऑल आऊट’ ही विशेष मोहीम राबविण्यात आली. पोलीस अधीक्षक श्रीकांत धिवरे यांच्या मार्गदर्शनाखाली १० ऑक्टोबर २०२६ रोजी राबविण्यात आलेल्या या मोहिमेदरम्यान जिल्ह्यातील अवैध धंदे, गुन्हेगारी प्रवृत्ती आणि संशयास्पद हालचालींवर पोलिसांनी लक्ष केंद्रित केले. या मोहिमेत जिल्ह्यातील सर्व पोलीस ठाणे आणि संबंधित शाखांच्या पथकांनी एकाच वेळी विविध ठिकाणी तपासणी, नाकाबंदी, गस्त आणि कायदेशीर कारवाई केली. अवैध गावठी हातभट्टी दारू, देशी-विदेशी दारू विक्री, जुगार, अंमली पदार्थ, अवैध वाळू वाहतूक, पानटपऱ्या, भंगार दुकाने तसेच इलेक्ट्रिक मोटार व वायर चोरीच्या गुन्ह्यांवर विशेष लक्ष देण्यात आले. फरार आरोपींचा शोध घेण्यासह हरविलेल्या महिला, पुरुष आणि बालकांचा शोध घेण्यासाठीही आवश्यक कार्यवाही करण्यात आली.

अवैध धंद्यांविरुद्ध मोठी कारवाई

पोलीस विभागाने प्रसिद्ध केलेल्या आकडेवारीनुसार, अवैध गावठी हातभट्टी दारूविरोधात ११८ गुन्हे दाखल करून ११८ आरोपींवर कारवाई करण्यात आली. या कारवाईत ५,३७७ लिटर गावठी हातभट्टी दारू, रसायन, वॉश आणि साहित्य जप्त करण्यात आले. जप्त मुद्देमालाची एकूण किंमत ५ लाख ७ हजार ४१४ रुपये असल्याचे प्रसिद्धिपत्रकात नमूद आहे. देशी व विदेशी दारू विक्रीविरोधात ४ गुन्हे दाखल करून ५ आरोपींवर कारवाई करण्यात आली. या वेळी दारूच्या एकूण १२५ बाटल्या जप्त करण्यात आल्या असून त्यांची किंमत १० हजार ५०० रुपये असल्याचे नमूद करण्यात आले आहे. जुगार कायद्यान्वये ७२ गुन्हे दाखल करून ८५ आरोपींवर कारवाई करण्यात आली. या कारवाईत ५२ हजार २५५ रुपये रोख रक्कम व जुगाराचे साहित्य जप्त करण्यात आले. शस्त्र अधिनियमान्वये १ गावठी कट्टा आणि १ तलवार जप्त करण्यात आली असून त्यांची नमूद किंमत अनुक्रमे २० हजार व २ हजार रुपये आहे.

वाहतूक नियमभंग करणाऱ्यांवरही कारवाई

मोटार वाहन कायद्यान्वये वाहतूक शाखेकडून १,२१८ केसेस करण्यात आल्या असून १० लाख ४४ हजार ४७० रुपयांचा दंड वसूल करण्यात आला. पोलीस ठाण्यांकडून आणखी ७७८ केसेस करून ५ लाख ६९ हजार ०१० रुपयांचा दंड वसूल करण्यात आला. मद्यप्राशन करून वाहन चालविणाऱ्यांविरुद्ध ३६ केसेस, तर मद्यप्राशन करून सार्वजनिक शांतता भंग करणाऱ्यांविरुद्ध ३५ केसेस करण्यात आल्या. समन्स व वॉरंट बजावणीच्या ४६८ कारवाया करण्यात आल्या. हॉटेल व ढाब्यांची ६७ ठिकाणी तपासणी करण्यात आली.

इतर गुन्ह्यांवरही पोलिसांचे लक्ष

भंगार दुकानांच्या तपासणीदरम्यान १०९ दुकाने तपासण्यात आली. त्यापैकी १४ ठिकाणी मुंबई पोलीस अधिनियमाच्या कलम १२४ अन्वये कारवाई करण्यात आली. पानटपऱ्यांविरोधात कोटपा कायद्यान्वये १०८ केसेस करण्यात आल्या, तर १०० मीटर परिसरातील ११ पानटपऱ्या निष्कासित करण्यात आल्या. इलेक्ट्रिक मोटार व वायर चोरीचे १ प्रकरण उघडकीस आणण्यात आले. या प्रकरणात १ मोटार पंप आणि १ मोटारसायकल असा एकूण २४ हजार रुपयांचा मुद्देमाल जप्त करण्यात आला. अवैध वाळूविरोधात १ गुन्हा दाखल करून १ आरोपीवर कारवाई करण्यात आली असून ६ हजार रुपयांचा मुद्देमाल जप्त करण्यात आला. अंमली पदार्थांविरोधात १६ गुन्हे दाखल करून १६ आरोपींवर कारवाई करण्यात आल्याचे प्रसिद्धिपत्रकात नमूद आहे. याशिवाय, हरविलेल्या व्यक्तींच्या शोध मोहिमेत ६२ महिला, ४६ पुरुष, ३० मुली आणि २ मुले यांचा शोध घेण्यात आला. पाहिजे असलेल्या आरोपींपैकी एकूण १० आरोपींना पकडण्यात आले, तर हद्दपार आरोपींविरुद्ध महाराष्ट्र पोलीस अधिनियमाच्या कलम १४२ अन्वये ६ कारवाया करण्यात आल्या. सायबर रिल्स संदर्भात २१ कारवाया करण्यात आल्या असून EOW अंतर्गत रक्कम ब्लॉक करण्याच्या ५ कारवायाही करण्यात आल्या.

उत्सव काळात नियमांचे पालन करण्याचे आवाहन

नवरात्रोत्सव शांततेत आणि सुरक्षित वातावरणात साजरा करावा, कायदा व सुव्यवस्थेचे पालन करावे, अफवा पसरवू नयेत आणि कोणतीही संशयास्पद हालचाल आढळल्यास तत्काळ पोलिसांना कळवावे, असे आवाहन जळगाव जिल्हा पोलिसांच्या वतीने करण्यात आले आहे. मद्यप्राशन करून वाहन चालवू नये, महिलांचा सन्मान राखावा आणि उत्सव काळात पोलिसांना सहकार्य करावे, असेही आवाहन करण्यात आले आहे. पोलीस अधीक्षक श्रीकांत धिवरे यांच्या मार्गदर्शनाखाली अपर पोलीस अधीक्षक संदीप गावित, अपर पोलीस अधीक्षक अशोक नखाते, सर्व उपविभागीय पोलीस अधिकारी, पोलीस ठाण्यांचे प्रभारी अधिकारी, वाहतूक शाखा, स्थानिक गुन्हे शाखा आणि संबंधित अधिकारी व अंमलदारांच्या पथकांनी या मोहिमेत सहभाग घेतला. ‘जळगाव जिल्हा पोलीस दल — आपली सुरक्षा, आमची जबाबदारी’ या संदेशातून नागरिकांनी सुरक्षित आणि शांततापूर्ण नवरात्रोत्सवासाठी पोलिसांना सहकार्य करण्याचे आवाहन करण्यात आले आहे.