गिरणी कामगाराचा नातू, रिक्षाचालकाचा मुलगा बनला एम.डी. बालरोगतज्ज्ञ! आईने शेतात राबून, वडिलांनी रिक्षा चालवून मुलाला घडविले डॉक्टर; आव्हाणेच्या डॉ. अमोल चौधरी यांची प्रेरणादायी यशोगाथा जिल्हा परिषद शाळेतून शिक्षणाची सुरुवात; मुंबईतील केईएम रुग्णालयापर्यंत मजल — कष्टकरी आई-वडिलांच्या त्यागाला मुलाच्या कर्तृत्वाची सलामी!

गिरणी कामगाराचा नातू, रिक्षाचालकाचा मुलगा बनला एम.डी. बालरोगतज्ज्ञ! आईने शेतात राबून, वडिलांनी रिक्षा चालवून मुलाला घडविले डॉक्टर; आव्हाणेच्...

गिरणी कामगाराचा नातू, रिक्षाचालकाचा मुलगा बनला एम.डी. बालरोगतज्ज्ञ!

आईने शेतात राबून, वडिलांनी रिक्षा चालवून मुलाला घडविले डॉक्टर; आव्हाणेच्या डॉ. अमोल चौधरी यांची प्रेरणादायी यशोगाथा

जिल्हा परिषद शाळेतून शिक्षणाची सुरुवात; मुंबईतील केईएम रुग्णालयापर्यंत मजल — कष्टकरी आई-वडिलांच्या त्यागाला मुलाच्या कर्तृत्वाची सलामी!

(आव्हाणे प्रतिनिधी भगवान चौधरी)

(संपादक : हेमकांत गायकवाड)

परिस्थिती कितीही प्रतिकूल असली, तरी मनात जिद्द, डोळ्यांत स्वप्न आणि कुटुंबाची भक्कम साथ असेल, तर यशाचा मार्ग निश्चितच सापडतो. याचा प्रत्यय जळगाव तालुक्यातील आव्हाणे येथील डॉ. अमोल चौधरी यांच्या प्रेरणादायी यशोगाथेतून येतो. आजोबा गिरणी कामगार, वडील उदरनिर्वाहासाठी रिक्षाचालक आणि आई शेतात कष्ट करणारी गृहिणी, अशा कष्टकरी कुटुंबातून पुढे आलेल्या डॉ. अमोल यांनी एम.डी. (बालरोगशास्त्र) ही पदव्युत्तर वैद्यकीय पदवी संपादन केली आहे. सध्या ते मुंबईतील प्रतिष्ठित सेठ जी. एस. वैद्यकीय महाविद्यालयाशी संलग्न केईएम रुग्णालयाच्या बालरोग विभागात कार्यरत आहेत. त्यांच्या या यशाने आव्हाणे गावाच्या शिरपेचात मानाचा तुरा रोवला आहे.

गिरणी बंद पडली अन् कुटुंबावर संकट; वडिलांनी खांद्यावर घेतली संसाराची जबाबदारी

डॉ. अमोल यांच्या कुटुंबाचा इतिहास कष्टाचा आणि संघर्षाचा आहे. त्यांचे आजोबा जळगाव येथील खान्देश मिलमध्ये कामगार म्हणून कार्यरत होते. मात्र, गिरणी बंद पडल्यानंतर कुटुंबाच्या उदरनिर्वाहाचा प्रश्न निर्माण झाला. अशा परिस्थितीत अमोल यांचे वडील लक्ष्मण चिंधू चौधरी यांनी बारावीनंतरचे शिक्षण सोडून कुटुंबाची जबाबदारी स्वीकारली आणि उदरनिर्वाहासाठी रिक्षा चालविण्यास सुरुवात केली.

स्वतःच्या शिक्षणाला विराम देऊन कुटुंबासाठी कष्ट करण्याचा निर्णय घेणाऱ्या लक्ष्मण चौधरी यांनी मुलाच्या शिक्षणाच्या स्वप्नाला मात्र कधीही खीळ बसू दिली नाही. दुसरीकडे, अमोल यांच्या आईने शेतात कष्ट करून मुलाच्या शिक्षणासाठी हातभार लावला. आई-वडिलांच्या घामातून आणि त्यागातून मुलाच्या उज्ज्वल भविष्याची पायाभरणी होत गेली.

वडिलांच्या रिक्षाचे चाक फिरत राहिले, आईचे शेतातील कष्ट सुरू राहिले आणि याच कष्टांच्या बळावर अमोल यांच्या स्वप्नांना पंख मिळत गेले.

आव्हाणेच्या जिल्हा परिषद शाळेतून सुरू झाला प्रवास

डॉ. अमोल यांच्या शिक्षणाची सुरुवात आव्हाणे येथील जिल्हा परिषद शाळेत झाली. पहिली ते पाचवीपर्यंतचे प्राथमिक शिक्षण त्यांनी याच शाळेत पूर्ण केले. त्यानंतर सहावी ते बारावीपर्यंतचे शिक्षण जळगाव येथील जवाहर नवोदय विद्यालयात घेतले.

पुढे वैद्यकीय क्षेत्रात करिअर करण्याचे ध्येय समोर ठेवून त्यांनी डॉ. उल्हास पाटील वैद्यकीय महाविद्यालय व रुग्णालयातून एमबीबीएसचे शिक्षण पूर्ण केले. त्यानंतर मुंबईतील सेठ जी. एस. वैद्यकीय महाविद्यालय आणि केईएम रुग्णालय येथे एम.डी. (बालरोगशास्त्र) ही पदव्युत्तर पदवी प्राप्त केली.

ग्रामीण भागातील जिल्हा परिषद शाळेतून सुरू झालेला हा प्रवास मुंबईतील नामांकित वैद्यकीय संस्थेपर्यंत पोहोचला. आज ते केईएम रुग्णालयाच्या बालरोग विभागात कार्यरत असून बालरुग्णांच्या आरोग्यसेवेत योगदान देत आहेत.

आई-वडिलांच्या त्यागाचे मुलाने केले सोने!

डॉ. अमोल यांचे वडील लक्ष्मण चिंधू चौधरी हे रिक्षाचालक असून आध्यात्मिक विचारसरणीचे आहेत. कष्टाला प्रतिष्ठा, प्रामाणिकपणा आणि जीवनातील मूल्यांना महत्त्व देणाऱ्या कुटुंबात अमोल यांची जडणघडण झाली. आर्थिक परिस्थिती मर्यादित असतानाही आई-वडिलांनी मुलाच्या शिक्षणासाठी केलेले प्रयत्न आज सार्थ ठरले आहेत.

एका बाजूला वडिलांचा रिक्षा व्यवसाय, दुसऱ्या बाजूला आईचे शेतीतील कष्ट आणि त्यातून मिळालेल्या आधारावर मुलाने वैद्यकीय शिक्षणाची कठीण वाट यशस्वीपणे पार केली. हे यश केवळ एका डॉक्टरचे यश नसून, आपल्या मुलांच्या भविष्यासाठी स्वतःच्या इच्छा बाजूला ठेवणाऱ्या असंख्य कष्टकरी आई-वडिलांच्या संघर्षाचे प्रतिनिधित्व करणारी कहाणी आहे.

ग्रामीण विद्यार्थ्यांसाठी प्रेरणेचा नवा आदर्श

आजच्या काळात उच्च शिक्षणाचा खर्च आणि स्पर्धेचे आव्हान लक्षात घेता, डॉ. अमोल चौधरी यांची यशोगाथा ग्रामीण भागातील विद्यार्थ्यांसाठी विशेष प्रेरणादायी आहे. परिस्थिती प्रतिकूल असली, तरी शिक्षणाची कास धरून सातत्याने प्रयत्न केल्यास मोठे यश मिळविता येते, हे त्यांनी आपल्या कर्तृत्वातून दाखवून दिले आहे.

ज्या कुटुंबात आजोबांनी गिरणीत काम केले, वडिलांनी कुटुंबासाठी रिक्षा चालविली आणि आईने शेतात राबून मुलाच्या शिक्षणासाठी हातभार लावला, त्याच कुटुंबातील मुलगा आज मुंबईतील नामांकित रुग्णालयात बालरोगतज्ज्ञ म्हणून कार्यरत आहे, ही बाब निश्चितच अभिमानास्पद आहे.

आव्हाणे गावातील या सुपुत्राच्या यशाने कष्टकरी कुटुंबातील मुलांसाठी नवी आशा निर्माण केली आहे. डॉ. अमोल चौधरी यांचे यश म्हणजे आई-वडिलांच्या घामाचे सोने, त्यागाचे सार्थक आणि शिक्षणाच्या सामर्थ्याचा जिवंत दाखला आहे!