फैजपूर काँग्रेसच्या चार नगरसेवकांना अपात्र ठरविण्याची मागणी शहराध्यक्ष शेख रियाज यांची वरिष्ठांकडे तक्रार

फैजपूर काँग्रेसच्या चार नगरसेवकांना अपात्र ठरविण्याची मागणी शहराध्यक्ष शेख रियाज यांची वरिष्ठांकडे तक्रार   इदू पिंजारी, फैजपूर (संपादक : हे...

फैजपूर काँग्रेसच्या चार नगरसेवकांना अपात्र ठरविण्याची मागणी

शहराध्यक्ष शेख रियाज यांची वरिष्ठांकडे तक्रार  

इदू पिंजारी, फैजपूर

(संपादक : हेमकांत गायकवाड)

फैजपूर नगरपरिषदेत काँग्रेस पक्षाच्या चिन्हावर निवडून आलेल्या चार नगरसेवक व नगरसेविकांनी पक्षशिस्तीचे उल्लंघन केल्याचा आरोप करीत त्यांना अपात्र ठरवावे, अशी मागणी फैजपूर शहर काँग्रेस कमिटीचे शहराध्यक्ष शेख रियाज यांनी पक्षाच्या वरिष्ठांकडे निवेदनाद्वारे केली आहे.

काँग्रेस पक्षाच्या चिन्हावर निवडून आलेल्या नगरसेवकांमध्ये प्रभाग क्रमांक १ मधून हकीम अहमद तडवी, एस.टी. प्रभाग क्रमांक २ मधून सादेका शेख दानिश, सर्वसाधारण महिला प्रभाग क्रमांक ७ मधून प्रियंका ईश्वर इंगळे तसेच प्रभाग क्रमांक ८ मधून सर्वसाधारण पुरुष उमेदवार इरफान शेख इक्बाल यांचा समावेश आहे.

दि. १२ रोजी काँग्रेसचे चार नगरसेवक तसेच शरद पवार गटाचे नगरसेवक अनवर अजगर खाटीक यांच्या उपस्थितीत माजी आमदार शिरीष मधुकरराव चौधरी यांच्या निवासस्थानी स्वीकृत सदस्य उमेदवारीबाबत बैठक पार पडली होती. या बैठकीत एकमताने ठराव करण्यात आला होता.

मात्र काँग्रेस गटनेते इरफान शेख इक्बाल यांनी या ठरावाचे पालन न करता पक्षनिर्णय डावलून भारतीय जनता पक्षाच्या नगराध्यक्षा दामिनी पवन सराफ यांचे पती पवन अनिल सराफ यांच्याशी अनुचित समन्वय साधत स्वीकृत सदस्य पदाचा प्रस्ताव पाठविल्याचा आरोप निवेदनात करण्यात आला आहे.

या प्रकारामुळे मुस्लिम समाजाची दिशाभूल झाली असून काँग्रेस पक्षाच्या विश्वासाला तडा गेला आहे. हा प्रकार पक्षशिस्तीचे गंभीर उल्लंघन असल्याने संबंधित नगरसेवकांवर कठोर कारवाई करावी, नियमानुसार अपात्रतेची नोटीस बजावावी तसेच काँग्रेस गट रद्द करावा, अशी ठाम मागणी शहर काँग्रेस कमिटी व पदाधिकाऱ्यांच्या वतीने करण्यात आली आहे.

या निवेदनाच्या प्रती काँग्रेसचे जिल्हाध्यक्ष, तालुकाध्यक्ष तसेच एन.एस.यू.आय.चे नेते धनंजय चौधरी यांना माहितीसाठी पाठविण्यात आल्याचेही कळविण्यात आले आहे.