महाशिवरात्रीनिमित्त शिवपिंडीवर साकारले महादेव-पार्वतीचे विलोभनीय ‘थ्री-डी’ चित्र; कलाकार सुनील दाभाडे यांची अनोखी कलासाधना जळगाव प्रतिनिधी ...
महाशिवरात्रीनिमित्त शिवपिंडीवर साकारले महादेव-पार्वतीचे विलोभनीय ‘थ्री-डी’ चित्र; कलाकार सुनील दाभाडे यांची अनोखी कलासाधना
जळगाव प्रतिनिधी
(संपादक -:- हेमकांत गायकवाड)
संपूर्ण देशात महाशिवरात्रीचा उत्सव मोठ्या भक्तिभावाने साजरा होत असताना जळगाव येथील चित्रकार व मूर्तीकार सुनील दाभाडे यांनी आपल्या कलेतून भगवान शंकरांना अनोखी मानवंदना अर्पण केली आहे. मंदिरातील शिवपिंडीवर त्यांनी साकारलेले भगवान महादेव आणि माता पार्वती यांचे आकर्षक ‘थ्री-डी’ (3D) चित्र भाविकांचे विशेष लक्ष वेधून घेत आहे. नेहमीच्या पारंपरिक सजावटीपेक्षा काहीतरी वेगळे करण्याच्या ध्यासातून सुनील दाभाडे यांनी ही कलाकृती साकारली. शिवपिंडीच्या गोलाकार आकाराचा कल्पकतेने वापर करत त्यांनी अर्धनारीनटेश्वर भाव प्रभावीपणे उभा केला आहे. चित्रात एका बाजूला नीलवर्ण, शांत आणि गंभीर भावातील महादेवांचे रूप साकारले असून, दुसऱ्या बाजूला माता पार्वतींचे कोमल, तेजस्वी आणि अलंकारयुक्त रूप अत्यंत बारकाईने रेखाटले आहे. रुद्राक्ष माळा, जटा, दागिने आणि सूक्ष्म रंगसंगतीमुळे हे चित्र प्रत्यक्ष मूर्तीच असल्याचा भास निर्माण करते.
“महाशिवरात्री हा प्रत्येक शिवभक्तासाठी मोठा उत्सव असतो. माझी कला हीच माझी भक्ती आहे. त्या भावनेतून मी शिवपिंडीवर हे थ्री-डी चित्र साकारले,” अशी भावना सुनील दाभाडे यांनी व्यक्त केली.
मंदिरात दर्शनासाठी येणारे भाविक ही कलाकृती पाहून अक्षरशः थक्क होत आहेत. अनेकांनी या कलाकृतीचे छायाचित्रण करून सोशल मीडियावर शेअर केले असून, त्याला मोठ्या प्रमाणावर प्रतिसाद मिळत आहे. सुनील दाभाडे यांच्या कल्पकतेचे आणि कलेतील बारकावे जपण्याच्या कौशल्याचे सर्वत्र कौतुक होत आहे. कलेच्या माध्यमातून अध्यात्म आणि आधुनिक चित्रशैलीचा सुंदर संगम साधत सुनील दाभाडे यांनी यंदाची महाशिवरात्री जळगावकरांसाठी अधिक संस्मरणीय केली आहे.
No comments