🚨 “थकबाकीदारांनो शेवटचा इशारा!” — सलग दुसऱ्या दिवशी पहाटेपासून धडक कारवाई; २५ गाळे सील, २५ ठिकाणी नळ कनेक्शन कट, ₹५ लाखांची वसुली

 “थकबाकीदारांनो शेवटचा इशारा!” — सलग दुसऱ्या दिवशी पहाटेपासून धडक कारवाई; २५ गाळे सील, २५ ठिकाणी नळ कनेक्शन कट, ₹५ लाखांची वसुली   चोपडा प्र...

 “थकबाकीदारांनो शेवटचा इशारा!” — सलग दुसऱ्या दिवशी पहाटेपासून धडक कारवाई; २५ गाळे सील, २५ ठिकाणी नळ कनेक्शन कट, ₹५ लाखांची वसुली  

चोपडा प्रतिनिधी

(संपादक -:- हेमकांत गायकवाड)

चोपडा नगरपरिषदेची थकबाकी वसुली मोहीम आज सलग दुसऱ्या दिवशी अधिक तीव्रतेने राबविण्यात आली. पहाटे ६.०० वाजल्यापासूनच नगरपरिषदेच्या पथकांनी शहरातील विविध शॉपिंग कॉम्प्लेक्समध्ये जाऊन थकीत गाळ्यांवर सील लावण्याची कारवाई सुरू केली.

आजच्या कारवाईत आंबेडकर शॉपिंग, पाटील गढी, स्वामी समर्थ, थाळनेर दरवाजा, श्रीकृष्ण मंदिर, यावल नाका, आशा टॉकीज आदी परिसरातील नगरपालिका शॉपिंग कॉम्प्लेक्समधील थकीत गाळ्यांवर कारवाई करण्यात आली.

यामध्ये आज रोजी २५ गाळ्यांना तात्काळ सील लावण्यात आले.

💧 २५ ठिकाणी नळ कनेक्शन खंडित

गाळ्यांवरील कारवाईसोबतच शहरातील विविध भागांतील थकीत मालमत्ताधारकांविरुद्ध कठोर पाऊल उचलण्यात आले. आज रोजी शहरातील २५ वेगवेगळ्या ठिकाणी नळ कनेक्शन तात्काळ कट करण्यात आले.

नळ कनेक्शन बंद झाल्यानंतर संबंधितांनी नगरपरिषदेकडे धाव घेत तातडीने थकबाकी भरण्याची प्रक्रिया सुरू केली.

📞 फोनची लगबग, लेखी वचनपत्र

रविवार आठवडे बाजार असल्याने अनेक गाळेधारकांनी मुख्याधिकारी व लोकप्रतिनिधींना फोन करून कारवाई थांबविण्याची विनंती केली. काहींनी तात्काळ पूर्ण थकबाकी भरून सील कारवाई टाळली.

तर काही गाळेधारकांनी सात दिवसांची मुदत मागून अर्धी रक्कम तात्काळ भरली व उर्वरित रक्कम सात दिवसांत भरण्याबाबत लेखी वचनपत्र सादर केले. तसेच ठरलेल्या मुदतीत भरणा न केल्यास “पुन्हा गाळ्यास सील लावण्यात यावे, याबाबत आमची काहीही हरकत नाही,” असे स्पष्टपणे लेखी नमूद केले.

💰 आजची वसुली — ₹५ लाख

आजच्या कारवाईनंतर एकूण सुमारे ₹५,००,०००/- (पाच लाख रुपये) इतकी थकबाकी वसूल करण्यात आली आहे.

सलग दुसऱ्या दिवशीच्या कठोर कारवाईमुळे शहरातील थकबाकीदारांमध्ये मोठी खळबळ उडाली असून अनेकांनी स्वखुशीने नगरपरिषद कार्यालयात येऊन थकबाकी भरण्यास सुरुवात केली आहे.

⚠️ प्रशासनाचा कडक इशारा कायम

नगरपरिषदेची एकूण थकबाकी अजूनही कोट्यवधी रुपयांत प्रलंबित आहे. महसूल वसुलीसाठी ही मोहीम पुढील काही दिवस अधिक तीव्र करण्यात येणार आहे.

कोणतीही शिफारस ग्राह्य धरली जाणार नाही.

मुदतीनंतर थकबाकी न भरल्यास तात्काळ सील कारवाई पुन्हा केली जाईल.

आवश्यक असल्यास जप्ती, बोजा नोंद व कायदेशीर कारवाई करण्यात येईल.

 “कर न भरता सुविधा नाहीत!”

चोपडा शहरात या सलग कारवाईमुळे थकबाकीदारांमध्ये स्पष्ट भीतीचे वातावरण निर्माण झाले आहे. नगरपरिषद प्रशासनाने अंतिम इशारा देत सांगितले आहे की, थकबाकी तात्काळ न भरल्यास सील, नळ कनेक्शन कट व कायदेशीर कारवाई अटळ आहे.