शेगावकरांसाठी आनंदाची बातमी : एलटीटी–बल्लारशाह सुपरफास्ट एक्स्प्रेसला शेगाव थांबा मंजूर; भाविकांची दीर्घकालीन मागणी पूर्ण

  शेगावकरांसाठी आनंदाची बातमी : एलटीटी–बल्लारशाह सुपरफास्ट एक्स्प्रेसला शेगाव थांबा मंजूर; भाविकांची दीर्घकालीन मागणी पूर्ण  पल्लवी पाटील ख...

 शेगावकरांसाठी आनंदाची बातमी : एलटीटी–बल्लारशाह सुपरफास्ट एक्स्प्रेसला शेगाव थांबा मंजूर; भाविकांची दीर्घकालीन मागणी पूर्ण 

पल्लवी पाटील खामगाव

(संपादक -:- हेमकांत गायकवाड)

संतनगरी शेगावसाठी अत्यंत महत्त्वाची व आनंदाची बातमी समोर आली असून एलटीटी–बल्लारशाह सुपरफास्ट एक्स्प्रेस (क्र. 22109/22110) या महत्त्वाच्या गाडीला शेगाव रेल्वे स्थानकावर अधिकृत थांबा मंजूर करण्यात आला आहे. त्यामुळे लाखो भाविकांसह परिसरातील नागरिकांना मोठा दिलासा मिळाला आहे.

शेगाव हे श्री संत गजानन महाराजांच्या पदस्पर्शाने पावन झालेले श्रद्धास्थान असून येथे दर्शनासाठी देशभरातून दररोज हजारो भाविक येत असतात. मात्र मुंबईहून येणारी एलटीटी–बल्लारशाह सुपरफास्ट एक्स्प्रेस शेगावला थांबत नसल्याने भाविक व स्थानिक नागरिकांना मोठ्या अडचणींचा सामना करावा लागत होता.

गेल्या अनेक वर्षांपासून या गाडीला शेगाव थांबा मिळावा, अशी सातत्याने मागणी होत होती. शेगाव संस्थान, व्यापारी संघटना तसेच स्थानिक नागरिकांनी रेल्वे प्रशासनाकडे वारंवार पाठपुरावा केला होता. अखेर रेल्वे मंत्रालयाने या मागणीची दखल घेत थांबा मंजूर केला आहे.

मंजुरीनुसार 22110 बल्लारशाह–लोकमान्य टिळक टर्मिनस (BPQ–LTT) व 22109 लोकमान्य टिळक टर्मिनस–बल्लारशाह (LTT–BPQ) या दोन्ही सुपरफास्ट गाड्या आता नियोजित वेळेनुसार शेगाव स्थानकावर थांबतील. यामुळे मुंबई, ठाणे, कल्याण, नाशिक, भुसावळ येथून शेगावला येणाऱ्या भाविकांचा प्रवास अधिक सोयीस्कर होणार आहे. तसेच शेगाव–खामगाव–जळगाव परिसरातील व्यापारी, नोकरदार व विद्यार्थ्यांनाही मुंबईसाठी थेट रेल्वे सेवा उपलब्ध होणार आहे.

या ऐतिहासिक निर्णयाचा भव्य शुभारंभ 6 मे 2026 रोजी रात्री 8 वाजता शेगाव रेल्वे स्थानकावर पार पडणार असून केंद्रीय राज्यमंत्री (स्वतंत्र प्रभार) आयुष व आरोग्य कुटुंब कल्याण मंत्रालय तसेच शिवसेना नेते ना. प्रतापराव जाधव यांच्या हस्ते हिरवा झेंडा दाखवून गाडीला पहिला थांबा दिला जाणार आहे. यावेळी लोकप्रतिनिधी, गजानन महाराज संस्थानचे विश्वस्त, रेल्वे अधिकारी व मोठ्या संख्येने नागरिक उपस्थित राहणार आहेत.

या निर्णयाबाबत बोलताना ना. प्रतापराव जाधव यांनी सांगितले की, “शेगाव हे देशभरातील भाविकांचे श्रद्धास्थान आहे. लाखो भाविकांची गैरसोय दूर व्हावी यासाठी रेल्वे मंत्री अश्विनी वैष्णव यांच्याकडे सातत्याने पाठपुरावा करण्यात आला. पंतप्रधान नरेंद्र मोदी व मुख्यमंत्री एकनाथ शिंदे यांच्या सहकार्यामुळे हा ऐतिहासिक निर्णय शक्य झाला.” दरम्यान, थांबा मंजूर झाल्याची माहिती मिळताच शेगाव शहरात आनंदाचे वातावरण निर्माण झाले आहे. व्यापारी महासंघाचे अध्यक्ष संजय शेटे यांनी या निर्णयामुळे शेगावच्या व्यापार-उद्योगाला चालना मिळेल, असे मत व्यक्त केले. तसेच गजानन महाराज भक्त मंडळाने रेल्वे मंत्रालय व ना. प्रतापराव जाधव यांचे आभार मानले आहेत. एकूणच, या निर्णयामुळे शेगावच्या विकासाला गती मिळणार असून भाविक व नागरिकांच्या प्रवासासाठी ही सुविधा अत्यंत लाभदायक ठरणार आहे.