शिवसेना प्रवेशानंतर बच्चू कडूंची प्रहार पदाधिकाऱ्यांसोबत पहिली संवाद सभा; पश्चिम विदर्भातील कार्यकर्त्यांची मोठी उपस्थिती

 शिवसेना प्रवेशानंतर बच्चू कडूंची प्रहार पदाधिकाऱ्यांसोबत पहिली संवाद सभा; पश्चिम विदर्भातील कार्यकर्त्यांची मोठी उपस्थिती   पल्लवी पाटील खा...

 शिवसेना प्रवेशानंतर बच्चू कडूंची प्रहार पदाधिकाऱ्यांसोबत पहिली संवाद सभा; पश्चिम विदर्भातील कार्यकर्त्यांची मोठी उपस्थिती  

पल्लवी पाटील खामगाव

(संपादक -:- हेमकांत गायकवाड)

विधान परिषद आमदार बच्चू कडू यांनी शिवसेनेत प्रवेश केल्यानंतर प्रहार जनशक्ती पक्षाच्या पदाधिकारी व कार्यकर्त्यांसोबत पहिलीच भव्य संवाद सभा अमरावती येथे आयोजित करण्यात आली. पश्चिम विदर्भातील प्रमुख कार्यकर्त्यांच्या उपस्थितीत झालेल्या या बैठकीत आगामी स्थानिक स्वराज्य संस्था निवडणुका, शेतकरी प्रश्न आणि संघटन बांधणी यावर सविस्तर चर्चा करण्यात आली.

अमरावती जिल्हा मध्यवर्ती सहकारी बँकेच्या सभागृहात शनिवारी दुपारी १२ वाजता सुरू झालेली ही बैठक तब्बल चार तास चालली. शिवसेना प्रवेशानंतर प्रहारच्या कोअर टीमसोबत बच्चू कडू यांची ही पहिली अधिकृत बैठक असल्याने संपूर्ण पश्चिम विदर्भाचे लक्ष या बैठकीकडे लागले होते.

बैठकीच्या सुरुवातीलाच बच्चू कडू यांनी शिवसेना प्रवेशामागील भूमिका स्पष्ट करताना सांगितले की, “शेतकरी, कष्टकरी आणि दिव्यांगांच्या प्रश्नांसाठी सत्तेत राहून लढणे गरजेचे आहे. प्रहारची विचारधारा आणि शिवसेनेची भूमिका यात साम्य आहे. प्रहार संपलेला नाही, तर अधिक ताकदीने काम करणार आहे.”

यावेळी जिल्हा परिषद, पंचायत समिती आणि नगरपालिका निवडणुकांच्या पार्श्वभूमीवर जागावाटप, उमेदवार निवड आणि प्रचार यंत्रणा यावरही चर्चा झाली. “जिथे प्रहारचा उमेदवार सक्षम असेल, तिथे शिवसेना प्रहारला ताकद देईल,” असे आश्वासन बच्चू कडू यांनी कार्यकर्त्यांना दिले.

बैठकीस बुलढाणा जिल्ह्यातून मोठ्या संख्येने पदाधिकारी उपस्थित होते. यामध्ये प्रहारचे जिल्हाप्रमुख मोहिते पाटील, जिल्हा उपप्रमुख अजय टप, नांदुरा तालुकाप्रमुख मानकर यांच्यासह मेहकर, चिखली व इतर तालुक्यांतील प्रमुख कार्यकर्त्यांचा समावेश होता.

जिल्हाप्रमुख मोहिते पाटील यांनी बच्चू कडू यांच्या निर्णयाला समर्थन देताना सांगितले की, “बच्चूभाऊंनी घेतलेला निर्णय योग्य आहे. बुलढाणा जिल्ह्यात प्रहार-शिवसेना युती अधिक भक्कम करू. शेतकऱ्यांच्या कर्जमाफी, पिकविमा आणि अतिवृष्टी नुकसानभरपाईसाठी एकत्रित लढा उभारू.”

बैठकीत शेतकरी प्रश्नांवर विशेष चर्चा करण्यात आली. सोयाबीन आणि कापसाला हमीभाव, पिकविमा कंपन्यांचा मनमानी कारभार, वीज तोडणी थांबविणे, दिव्यांग पेन्शनमध्ये वाढ आणि प्रलंबित प्रकरणे निकाली काढण्याची मागणी यावेळी करण्यात आली. तसेच प्रत्येक तालुक्यात शिवसेना-प्रहार संयुक्त समन्वय समिती स्थापन करण्याचा निर्णयही घेण्यात आला.

युवकांच्या प्रश्नांवर बोलताना कंत्राटी भरती बंद करून कायमस्वरूपी नोकरभरती करावी तसेच एमआयडीसीमध्ये स्थानिक युवकांना प्राधान्य द्यावे, अशी मागणी बैठकीतून करण्यात आली.

कार्यकर्त्यांशी संवाद साधताना बच्चू कडू भावूक झाले. “मी शिवसेनेत गेलो म्हणजे प्रहार संपला असे नाही. प्रहार ही चळवळ आहे. पक्षाचे चिन्ह आणि नोंदणी कायम राहील. मी तुमचा बच्चूभाऊच आहे. तुमच्या सुख-दुःखात पहिल्यासारखाच उभा राहीन. फक्त लढण्याची जागा बदलली, लढा तोच आहे,” असे सांगत त्यांनी कार्यकर्त्यांना भावनिक साद घातली. बैठकीनंतर उपस्थित पदाधिकाऱ्यांनी एकमुखाने बच्चू कडू यांच्या निर्णयाला पाठिंबा दर्शवित  “जय प्रहार, जय शिवसेना” च्या घोषणांनी सभागृह दणाणून सोडले. या बैठकीस अमरावती, अकोला, वाशिम, यवतमाळ आणि बुलढाणा जिल्ह्यातील जिल्हाप्रमुख, तालुकाप्रमुख, महिला आघाडी, युवक आघाडी आणि दिव्यांग आघाडीचे पदाधिकारी मोठ्या संख्येने उपस्थित होते. पश्चिम विदर्भाच्या राजकारणात बच्चू कडू यांच्या या बैठकीमुळे नवे राजकीय समीकरण तयार होण्याची शक्यता व्यक्त होत असून आगामी काळात प्रहार-शिवसेना युतीची ताकद अधिक स्पष्टपणे दिसून येईल, अशी चर्चा राजकीय वर्तुळात सुरू आहे.