निलंगा तालुक्यातील मदनसुरी परिसरात महावितरणचा मनमानी कारभार; नागरिक आणि शेतकरी त्रस्त!

निलंगा तालुक्यातील मदनसुरी परिसरात महावितरणचा मनमानी कारभार; नागरिक आणि शेतकरी त्रस्त!  लातूर, जि. प्र. (उत्तम माने ) (संपादक -:- हेमकांत गा...

निलंगा तालुक्यातील मदनसुरी परिसरात महावितरणचा मनमानी कारभार; नागरिक आणि शेतकरी त्रस्त! 

लातूर, जि. प्र. (उत्तम माने )

(संपादक -:- हेमकांत गायकवाड)

निलंगा तालुक्यातील कोकळगाव, मुदगड, एकोजी, आणि सरवडी (मदनसुरी परिसर) परिसरात महावितरणचा ढिसाळ आणि मनमानी कारभार चव्हाट्यावर आला आहे. गावांसाठी स्वतंत्र गावठाण अंतर्गत २४ तास अखंडित वीज पुरवठ्याची घोषणा कागदावरच राहिली असून, प्रत्यक्षात मात्र विजेचा लपंडाव नित्याचाच झाला आहे. यामुळे सामान्य नागरिकांना प्रचंड उकाड्याचा त्रास सहन करावा लागत असून, परिसरातील शेती आणि पशुधनाचा प्रश्न गंभीर बनला आहे.

 उघड्या 'डीपी' आणि घरांवरून जाणाऱ्या तारा; अपघाताची टांगती तलवार!

परिसरात अनेक ठिकाणी महावितरणचे वीज रोहित्रे (डीपी) उघड्या अवस्थेत पडलेली आहेत. यामुळे निष्पाप नागरिक आणि मुक्या जनावरांच्या जिवाला मोठा धोका निर्माण झाला आहे. धक्कादायक बाब म्हणजे, कोकळगाव येथे मागील अनेक वर्षांपासून रहिवासी घरांच्या वरून मुख्य विद्युत वाहक (मेन) तारा गेल्या आहेत. एखादी मोठी दुर्घटना घडण्याची शक्यता असतानाही, स्थानिक महावितरण कर्मचाऱ्यांनी याकडे डोळेझाक केली आहे. अनेक ठिकाणी वादळी वाऱ्यामुळे वीज खांब (पोल) उन्मळून पडले आहेत, परंतु ते दुरुस्त करण्याची तसदीही प्रशासनाने घेतलेली नाही.

अनेकदा निवेदने देऊनही अधिकारी ढिम्मच!"

 ग्रामस्थांनी या समस्यांबाबत महावितरणच्या वरिष्ठ अधिकाऱ्यांना वारंवार लेखी निवेदने दिली आहेत. मात्र, या निवेदनांकडे अधिकारी सोयीस्कर कानाडोळा करत आहेत. विशेष म्हणजे, वीज गुल झाल्यावर किंवा तक्रार करण्यासाठी नागरिक फोन करतात, तेव्हा महावितरणचे कर्मचारी फोन उचलत नसल्याचा संतापजनक आरोप नागरिकांनी केला आहे.

 शेतीसाठी केवळ ५ तास वीज; पिके वाळू लागली, जनावरांच्या पाण्याचा प्रश्न गंभीर

एकीकडे ऐन उन्हाळ्यात नागरिकांना उकाड्याचा त्रास सहन करावा लागत असताना, दुसरीकडे महावितरणने शेतकऱ्यांचे कंबरडे मोडले आहे. शेतीसाठी दिवसाकाठी केवळ ५ तास वीज दिली जात आहे.

अपुऱ्या वीज पुरवठ्यामुळे उभी पिके डोळ्यांदेखत वाळू लागली आहेत.

पाण्याची टंचाई: शेतातील विहिरी आणि कूपनलिका चालवता येत नसल्याने पशूंसाठी आणि नागरिकांच्या पिण्याच्या पाण्याचा गंभीर प्रश्न निर्माण झाला आहे.आंदोलनाचा इशारा!

महावितरणच्या या मनमानी आणि बेजबाबदार कारभारामुळे ग्रामीण भागातील जनतेमध्ये तीव्र असंतोष पसरला आहे. उघड्या डीपी बंद करणे, घरावरील धोकादायक तारा हटवणे, पडलेले पोल पूर्ववत करणे आणि शेतीसाठी वीज पुरवठा वाढवणे या मागण्या तातडीने पूर्ण न झाल्यास, परिसरातील ग्रामस्थ आणि शेतकऱ्यांनी महावितरण कार्यालयावर धडक मोर्चा काढण्याचा व तीव्र आंदोलन करण्याचा इशारा दिला आहे.