अहिल्याबाई होळकर माध्यमिक विद्यालय, कमळगाव येथे उत्साहात आंतरराष्ट्रीय योग दिन साजरा

अहिल्याबाई होळकर माध्यमिक विद्यालय, कमळगाव येथे उत्साहात आंतरराष्ट्रीय योग दिन साजरा चोपडा तालुका प्रतिनिधी : (संपादक : हेमकांत गायकवाड) आंत...

अहिल्याबाई होळकर माध्यमिक विद्यालय, कमळगाव येथे उत्साहात आंतरराष्ट्रीय योग दिन साजरा

चोपडा तालुका प्रतिनिधी :

(संपादक : हेमकांत गायकवाड)

आंतरराष्ट्रीय योग दिनानिमित्त अहिल्याबाई होळकर माध्यमिक विद्यालय, कमळगाव येथे रविवार (दि. 21 जून 2026) रोजी सकाळी 7 वाजता योग दिनाचा कार्यक्रम उत्साहपूर्ण वातावरणात संपन्न झाला. विद्यार्थ्यांमध्ये योगाविषयी जागरूकता निर्माण करण्याच्या उद्देशाने आयोजित करण्यात आलेल्या या उपक्रमास शिक्षक, शिक्षकेतर कर्मचारी व विद्यार्थ्यांचा उत्स्फूर्त प्रतिसाद लाभला.

यावेळी विद्यालयाचे मुख्याध्यापक व्ही.सी.पाचपोळ एस.एस.जाधव,एन.पी.पाटील,आर.एम.पाटील,अर्जुन कोळी यांच्यासह सर्व शिक्षक व शिक्षकेतर कर्मचारी उपस्थित होते.

कार्यक्रमाच्या प्रारंभी मुख्याध्यापक श्री पाचपोळ यांनी प्रास्ताविकातून योगाचे महत्त्व अधोरेखित केले. त्यानंतर नितीन पाटील यांनी आंतरराष्ट्रीय योग दिनाची पार्श्वभूमी, योगाचे शारीरिक व मानसिक आरोग्यासाठी होणारे फायदे तसेच निरोगी जीवनशैली आणि व्यक्तिमत्त्व विकासामध्ये योगाचे असलेले योगदान याविषयी सविस्तर मार्गदर्शन केले.

यावेळी नितीन पाटील यांनी विविध योगासने प्रत्यक्ष करून दाखवत विद्यार्थी, शिक्षक व शिक्षकेतर कर्मचाऱ्यांकडूनही त्यांचा सराव करून घेतला. वज्रासन, वृक्षासन, ताडासन, पर्वतासन, भ्रामरी, अनुलोम-विलोम, शवासन यांसह विविध योगप्रकारांचे प्रात्यक्षिक सादर करण्यात आले.

तसेच अर्जुन कोळी यांनी योगाचे महत्त्व विशद करणारे आकर्षक फलकलेखन करून उपस्थितांचे लक्ष वेधून घेतले. कार्यक्रमाच्या यशस्वी आयोजनासाठी सर्व शिक्षक, शिक्षकेतर कर्मचारी व विद्यार्थ्यांनी मोलाचे योगदान दिले.

योगामुळे निरोगी शरीर,शांत मन आणि सुदृढ समाज घडतो, हा संदेश या कार्यक्रमातून विद्यार्थ्यांना देण्यात आला.