आमोद्यात दुर्दैवी अपघात; टीव्ही संच कोसळून १३ वर्षीय बालिकेचा मृत्यू उपचारादरम्यान प्राणज्योत मालवली; गावात शोककळा

आमोद्यात दुर्दैवी अपघात; टीव्ही संच कोसळून १३ वर्षीय बालिकेचा मृत्यू उपचारादरम्यान प्राणज्योत मालवली; गावात शोककळा  इदू पिंजारी  फैजपूर (संप...

आमोद्यात दुर्दैवी अपघात; टीव्ही संच कोसळून १३ वर्षीय बालिकेचा मृत्यू

उपचारादरम्यान प्राणज्योत मालवली; गावात शोककळा 

इदू पिंजारी  फैजपूर

(संपादक -:- हेमकांत गायकवाड)

यावल तालुक्यातील आमोदा येथे रविवारी पहाटे अत्यंत दुर्दैवी घटना घडली. घरातील कोठीवर ठेवलेला टीव्ही संच अचानक खाली कोसळून डोक्याला गंभीर दुखापत झाल्याने १३ वर्षीय बालिकेचा उपचारादरम्यान मृत्यू झाला. या घटनेमुळे आमोदा गावासह परिसरात हळहळ व्यक्त होत आहे.

मिळालेल्या माहितीनुसार, नाजमीन मोहम्मद इसाक पिंजारी (वय १३) ही रविवारी पहाटे आपल्या घरात असताना घरातील कोठीवर ठेवलेला टीव्ही संच अचानक खाली पडला. टीव्ही थेट तिच्या डोक्यावर आदळल्याने ती गंभीर जखमी झाली.

घटनेनंतर कुटुंबीयांनी तातडीने तिला उपचारासाठी रुग्णालयात दाखल केले. प्राथमिक उपचारानंतर पुढील उपचारासाठी भुसावळ येथील रुग्णालयात हलविण्यात आले. मात्र, उपचार सुरू असतानाच तिची प्रकृती चिंताजनक बनली आणि डॉक्टरांनी तिला मृत घोषित केले.

नाजमीन ही स्थानिक शाळेत शिक्षण घेत होती. तिच्या अकाली निधनामुळे शाळा, मित्रपरिवार आणि गावात शोककळा पसरली आहे. गरीब कुटुंबातील या चिमुरडीच्या निधनाने कुटुंबावर दुःखाचा डोंगर कोसळला असून नागरिकांकडून कुटुंबीयांप्रती संवेदना व्यक्त करण्यात येत आहेत.

या प्रकरणी पोलिसांनी अकस्मात मृत्यूची नोंद करून पुढील तपास सुरू केला आहे. शवविच्छेदनाची प्रक्रिया पूर्ण करण्यात आली असून घटनेच्या नेमक्या कारणांचा तपास केला जात आहे.

दरम्यान, घरामध्ये ठेवण्यात येणाऱ्या टीव्ही, कपाटे व इतर जड वस्तू सुरक्षितरीत्या बसविणे किती आवश्यक आहे, याची जाणीव करून देणारी ही घटना ठरली आहे.

— नाजमीनच्या निधनाने आमोदा गावावर शोककळा; कुटुंबीयांवर दुःखाचा डोंगर.