निलंगा उपजिल्हाधिकारी कार्यालयासमोर शेतकऱ्याचे खाट टाकून आमरण उपोषण; पावसातही आंदोलन सुरू

 निलंगा उपजिल्हाधिकारी कार्यालयासमोर शेतकऱ्याचे खाट टाकून आमरण उपोषण; पावसातही आंदोलन सुरू    लातूर, जि. प्र. (उत्तम माने ) (संपादक -:- हेमक...

 निलंगा उपजिल्हाधिकारी कार्यालयासमोर शेतकऱ्याचे खाट टाकून आमरण उपोषण; पावसातही आंदोलन सुरू 

  लातूर, जि. प्र. (उत्तम माने )

(संपादक -:- हेमकांत गायकवाड)

निलंगा : जाजनुर-लांबोटा शिवरस्त्यावरील चुकीच्या कामामुळे शेतीचे नुकसान होत असून, प्रशासनाने दखल न घेतल्याने निलंगा तालुक्यातील जाजनुर येथील शेतकरी `सागर रामराव गोमसाळे` यांनी `मंगळवार, 7 जुलै 2026` पासून निलंगा उपजिल्हाधिकारी कार्यालयासमोर खाट टाकून आमरण उपोषण सुरू केले आहे. आंदोलनाचा आज दुसरा दिवस असून मुसळधार पावसातही हे उपोषण सुरूच आहे. गोमसाळे यांनी दिलेल्या माहितीनुसार, जाजनुर-लांबोटा शिवरस्त्याचे काम करताना पाण्याच्या नैसर्गिक प्रवाहाचा विचार न करता मोरी `culvert` दुसऱ्याच ठिकाणी टाकण्यात आली. त्यामुळे पावसाचे पाणी थेट त्यांच्या शेतात साचत आहे. यामुळे पिकांचे मोठे नुकसान होत आहे. तसेच शेतीची मशागत करणे आणि शेतीमालाची वाहतूक करणेही कठीण झाले आहे.

गोमसाळे यांची जाजनुर येथील पाझर तलावाशेजारील वडिलोपार्जित शेती १९७८ मध्ये तलाव प्रकल्पासाठी संपादित करण्यात आली होती. मात्र `2024` पर्यंत ७/१२ उताऱ्यावर त्यांची नावे होती. नंतर अचानक ती नावे कमी करण्यात आली. या जमिनीवरच संपूर्ण कुटुंबाचा उदरनिर्वाह अवलंबून असल्याने हा निर्णय त्यांच्यासाठी मोठा धक्का असल्याचे ते म्हणाले. या संदर्भात संबंधित विभागाकडे वारंवार तक्रारी आणि पाठपुरावा करूनही कोणतीही ठोस कारवाई न झाल्याने अखेर त्यांनी आमरण उपोषणाचा मार्ग स्वीकारला. जाजनुर-लांबोटा शिवरस्त्यावर टाकण्यात आलेली पाण्याची मोरी मूळ नैसर्गिक प्रवाहाच्या ठिकाणी स्थलांतरित करावी, जेणेकरून शेतीचे नुकसान थांबेल. या संपूर्ण प्रकरणाची वरिष्ठ स्तरावर चौकशी करून संबंधित जबाबदार अधिकाऱ्यांवर योग्य ती कारवाई करण्यात यावी. उपोषणस्थळी प्रशासनाच्या वरिष्ठ अधिकाऱ्यांनी भेट देऊन तातडीने तोडगा काढावा, अशी मागणी गोमसाळे यांनी केली आहे. तोपर्यंत मागण्या मान्य होईपर्यंत उपोषण मागे घेणार नसल्याचा पवित्रा त्यांनी घेतला आहे.