गण गण गणात बोते’च्या जयघोषाने खामगाव नगरी दुमदुमली! श्री गजानन महाराजांच्या पालखी सोहळ्यात हजारो वारकरी तल्लीन; टाळ-मृदंगांच्या गजरात भक्तीच...
गण गण गणात बोते’च्या जयघोषाने खामगाव नगरी दुमदुमली!
श्री गजानन महाराजांच्या पालखी सोहळ्यात हजारो वारकरी तल्लीन; टाळ-मृदंगांच्या गजरात भक्तीचा जल्लोष
पल्लवी पाटील, खामगाव
(संपादक -:- हेमकांत गायकवाड)
संत शिरोमणी श्री गजानन महाराजांच्या जयघोषाने खामगाव नगरी भक्तिमय झाली. श्री गजानन महाराजांच्या पालखी सोहळ्यानिमित्त शहरातून निघालेल्या दिंड्यांमध्ये हजारो वारकरी व भाविक सहभागी झाले होते. टाळ-मृदंग, झांज आणि लेझीमच्या तालावर भक्तगण तल्लीन झाले असून, संपूर्ण शहर ‘गण गण गणात बोते’ या नामघोषाने दुमदुमून गेले.
सकाळपासूनच खामगाव शहरातील विविध भागांतून भाविक मोठ्या संख्येने पालखी सोहळ्यात सहभागी झाले. हातात भगवे ध्वज, कपाळी गंध आणि मुखी श्रींचे नाम घेऊन वारकऱ्यांच्या दिंड्या उत्साहात मार्गक्रमण करत होत्या. टाळ, मृदंग, झांज आणि लेझीमच्या तालावर वारकरी भक्तिमय वातावरणात नृत्य करत होते.
पालखी सोहळ्याच्या मार्गावर ठिकठिकाणी भाविकांनी श्रींच्या पालखीचे भक्तिभावाने स्वागत केले. महिला, पुरुष, लहान मुले तसेच ज्येष्ठ नागरिकांनी रांगोळ्या काढून आणि पुष्पवृष्टी करून पालखीचे स्वागत केले. अनेक ठिकाणी भाविकांसाठी महाप्रसादाचेही आयोजन करण्यात आले होते.
श्री गजानन महाराज संस्थानच्या वतीने पालखी सोहळ्याचे नियोजन करण्यात आले होते. सोहळ्यादरम्यान भाविकांची मोठी गर्दी लक्षात घेता पोलीस प्रशासनाच्या वतीने चोख बंदोबस्त ठेवण्यात आला होता. प्रशासन व आयोजकांच्या नियोजनामुळे सोहळा शिस्तबद्ध पद्धतीने पार पडला.
या सोहळ्यात सहभागी झालेल्या एका भाविकांने भावना व्यक्त करताना सांगितले की, “खामगावात गेल्या अनेक वर्षांपासून असा भव्य आणि भक्तिमय सोहळा अनुभवायला मिळाला नव्हता. आज श्रींच्या कृपेने संपूर्ण खामगाव नगरी भक्तिरसात न्हाऊन निघाली आहे.”
श्री गजानन महाराजांच्या पालखी सोहळ्यामुळे खामगाव शहरात दिवसभर भक्तिमय वातावरण निर्माण झाले होते. हजारो भाविकांच्या सहभागाने पार पडलेल्या या सोहळ्याने खामगावची आध्यात्मिक आणि धार्मिक परंपरा पुन्हा एकदा अधोरेखित केली.
आयोजक :
श्री गजानन महाराज संस्थान, खामगाव व समस्त भाविक भक्तगण
॥ गण गण गणात बोते ॥ 🙏
No comments