जळगाव गोदावरी तंत्रनिकेतन कॉलेज येथे शिक्षक दिन साजरा

 जळगाव गोदावरी तंत्रनिकेतन कॉलेज येथे शिक्षक दिन साजरा  लियाकत शहा जळगाव (संपादक -:- हेमकांत गायकवाड) जळगाव:- भारताचे महान तत्त्वज्ञ, शिक्षण...

 जळगाव गोदावरी तंत्रनिकेतन कॉलेज येथे शिक्षक दिन साजरा 

लियाकत शहा जळगाव

(संपादक -:- हेमकांत गायकवाड)

जळगाव:- भारताचे महान तत्त्वज्ञ, शिक्षणतज्ज्ञ आणि माजी राष्ट्रपती डॉ. सर्वपल्ली राधाकृष्णन यांच्या जयंतीनिमित्त  गोदावरी तंत्रनिकेतन, जळगाव येथे दिनांक 5 सप्टेंबर रोजी शिक्षक दिन उत्साहपूर्ण आणि आनंदमय वातावरणात साजरा करण्यात आला. विद्यार्थ्यांनी आपल्या शिक्षकांप्रती कृतज्ञता व्यक्त करत त्यांच्या ज्ञानदानाबरोबरच संस्कार, मार्गदर्शन आणि प्रेरणादायी योगदानाचा गौरव केला.

कार्यक्रमाच्या प्रारंभी महाविद्यालयाचे प्राचार्य डॉ. विजयकुमार पाटील यांनी शिक्षक दिनाचे महत्त्व विशद केले. शिक्षक हे केवळ ज्ञान देणारे नसून विद्यार्थ्यांच्या व्यक्तिमत्त्वाला आकार देणारे, त्यांच्या आयुष्याला योग्य दिशा देणारे आणि भविष्यासाठी सक्षम बनविणारे मार्गदर्शक असतात, असे त्यांनी आपल्या मार्गदर्शनपर भाषणातून सांगितले. विद्यार्थ्यांच्या सर्वांगीण विकासात शिक्षकांची भूमिका अत्यंत मोलाची असल्याचेही त्यांनी नमूद केले.

शिक्षक दिनाचे औचित्य साधून विद्यार्थ्यांसाठी भाषण स्पर्धेचे आयोजन करण्यात आले. या स्पर्धेत विद्यार्थ्यांनी शिक्षकांचे जीवनातील महत्त्व, शिक्षकांचे मार्गदर्शन, संस्कार, प्रेरणा तसेच विद्यार्थ्यांच्या यशामागील शिक्षकांचे योगदान यावर प्रभावीपणे आपले विचार मांडले. स्पर्धेत तन्वी पवार हिने प्रथम, कांचन सोनवणे हिने द्वितीय, तर सिद्धेश वाणी याने तृतीय क्रमांक पटकावला.

यावेळी विद्यार्थ्यांनी आपल्या मनोगतांमधून शिक्षकांप्रती मनःपूर्वक आभार आणि कृतज्ञता व्यक्त केली. शिक्षकांनी दिलेले ज्ञान, संस्कार, प्रेरणा आणि सातत्यपूर्ण मार्गदर्शन हे विद्यार्थ्यांच्या यशाचा भक्कम पाया आहे, अशी भावना विद्यार्थ्यांनी व्यक्त केली.

या कार्यक्रमातून ‘शिक्षक-विद्यार्थी नाते हे केवळ वर्गखोलीपुरते मर्यादित नसून ते विश्वास, संस्कार, आपुलकी आणि प्रेरणेवर आधारित असते’ हा संदेश प्रभावीपणे अधोरेखित झाला. शिक्षक दिनाच्या निमित्ताने विद्यार्थ्यांनी आपल्या शिक्षकांप्रती आदर व कृतज्ञता व्यक्त करत त्यांच्या अमूल्य योगदानाला मनापासून अभिवादन केले.

कार्यक्रमाच्या यशस्वी आयोजनासाठी महाविद्यालयातील शिक्षक, शिक्षकेतर कर्मचारी आणि विद्यार्थ्यांनी विशेष परिश्रम घेतले. उत्स्फूर्त सहभाग आणि आनंददायी वातावरणामुळे गोदावरी तंत्रनिकेतनातील यंदाचा शिक्षक दिन सोहळा संस्मरणीय ठरला. सदर कार्यक्रमाच्या आयोजनाबद्दल फाउंडेशनचे पदाधिकारी यांनी कौतुक केले.