दसनूर येथे गुर्जर समाजाचा २० वा गुणगौरव सोहळा उत्साहात संपन्न! १२२ गुणवंत विद्यार्थ्यांसह ३० विशेष गौरवार्थींचा सन्मान; शिक्षण, करिअर आणि सामाजिक बांधिलकी जपण्याचे मान्यवरांचे आवाहन

दसनूर येथे गुर्जर समाजाचा २० वा गुणगौरव सोहळा उत्साहात संपन्न! १२२ गुणवंत विद्यार्थ्यांसह ३० विशेष गौरवार्थींचा सन्मान; शिक्षण, करिअर आणि सा...

दसनूर येथे गुर्जर समाजाचा २० वा गुणगौरव सोहळा उत्साहात संपन्न!

१२२ गुणवंत विद्यार्थ्यांसह ३० विशेष गौरवार्थींचा सन्मान; शिक्षण, करिअर आणि सामाजिक बांधिलकी जपण्याचे मान्यवरांचे आवाहन

रावेर प्रतिनिधी : मुबारक तडवी

(संपादक : हेमकांत गायकवाड)

रावेर तालुक्यातील दसनूर येथे गुर्जर गौरव समितीच्या वतीने आयोजित गुर्जर समाजाचा २० वा गुणगौरव सोहळा गुरुवार, दि. १२ नोव्हेंबर रोजी मोठ्या उत्साहात आणि जल्लोषपूर्ण वातावरणात पार पडला. या सोहळ्यात शैक्षणिक क्षेत्रात उल्लेखनीय यश संपादन करणाऱ्या १२२ गुणवंत विद्यार्थ्यांसह विविध क्षेत्रांत विशेष कामगिरी करणाऱ्या ३० गौरवार्थींचा, अशा एकूण १५२ मान्यवरांचा प्रशस्तिपत्र व सन्मानचिन्ह देऊन गौरव करण्यात आला. गेल्या दोन दशकांपासून अखंडपणे सुरू असलेल्या या स्तुत्य उपक्रमातून समाजातील नव्या पिढीला शिक्षण आणि प्रगतीची प्रेरणा मिळत आहे.

कार्यक्रमाच्या अध्यक्षस्थानी पी. टी. महाजन सर होते. प्रमुख अतिथी म्हणून विधान परिषद सदस्य आमदार नंदकिशोर महाजन, मुंबई येथील डॉ. भूषण पाटील, नाशिक येथील उद्योजक प्रमोद महाजन, भुसावळ येथील सेवानिवृत्त प्राध्यापिका माधुरी गुजर तसेच तालुका कृषी अधिकारीपदी निवड झालेल्या साक्षी पाटील यांची प्रमुख उपस्थिती होती.

यावेळी मान्यवरांनी विद्यार्थ्यांना शिक्षणासोबतच आरोग्यविषयक जागरूकता, स्वयंरोजगाराच्या विविध संधी, स्पर्धा परीक्षांची तयारी, करिअर निवड आणि भविष्यातील शैक्षणिक वाटचाल याविषयी सखोल मार्गदर्शन केले. केवळ शैक्षणिक गुणवत्ताच नव्हे, तर चांगले संस्कार, जिद्द, मेहनत आणि सामाजिक बांधिलकी यांच्या बळावर जीवनात यशस्वी व्हावे, असे प्रेरणादायी आवाहन मान्यवरांनी विद्यार्थ्यांना केले.

कार्यक्रमाचे प्रास्ताविक गुर्जर गौरव समितीचे अध्यक्ष सुनील पाटील यांनी केले. याप्रसंगी विविध क्षेत्रांत उल्लेखनीय यश संपादन करून समाजाचा नावलौकिक वाढविणाऱ्या समाजबांधवांचाही विशेष सन्मान करण्यात आला. गुणवंत विद्यार्थ्यांच्या यशाचे कौतुक करत उपस्थित मान्यवरांनी त्यांच्या उज्ज्वल भविष्यासाठी शुभेच्छा दिल्या.

गेल्या २० वर्षांपासून सुरू असलेल्या या गुणगौरव सोहळ्याने समाजातील शैक्षणिक वातावरण अधिक समृद्ध करण्याचे महत्त्वपूर्ण कार्य केले आहे. गुणवंतांचा सन्मान, कर्तृत्वाचा गौरव आणि नव्या पिढीला प्रोत्साहन देणारा हा उपक्रम समाजाच्या एकजुटीचे आणि शैक्षणिक प्रगतीच्या ध्येयाचे प्रतीक ठरत आहे.

कार्यक्रमाच्या यशस्वितेसाठी दसनूर ग्रामस्थ, गुर्जर गौरव समितीचे पदाधिकारी आणि गुर्जर समाज बांधवांनी विशेष परिश्रम घेतले. समाजातील गुणवंतांच्या पाठीवर कौतुकाची थाप देत त्यांच्या यशाचा गौरव करणारा हा सोहळा उत्साहपूर्ण वातावरणात संपन्न झाला.